RABULèTS2002 – Vol. 2 dèl TRWÈSyin.me anêye – Nos rivla èt à l’ pâdje : 60

Trwès mwès foûs èt on s’ rènonde…

Kinze djoûs passés à dwârmu, tronner lès fîves èt ratchî tripes èt boyas. Nén moyén d’ è fé ène fayêye broke. Pigote à migote on s’ avéve risayî à ralignî dès tûzâdjes, ritèchî dès mos èt lès rimète bén èxhène. K’c’ èstéve deur ! Nos faut-i dîre k’on a stî à deûs dwèts d’ tot lèyî tchêre èt s’ djoker di continuwer à "fé dins l’ walon" ? Bén oyi-da, ça nos avancéve à kwè ? A bén mwinsse ki wêre, ènndon… D’ ostant k’ lès rècoradjemints, k’ on a èspèré on lon timps, ç’ a z-a stî po Ratinco. Nèlu po dîre k’i s’ avéve acostumé à prinde do plêji à lîre nos pititès bièstrîyes, à riwêtî nos imaudjes, èt k’ça lî mankéve. Faut-i riconèxhe k’ça nos a grètouyî èt fé mau èwousse ki ça n’ passe èt nén ? Bén oyi-da. Mins, come l’ a si bén à peu près dit l’ Rudîyeu Kiplonke : "Si t’és capâbe di l’ r’muchî è t’ scanson èt risèrer t’ cinke, t’ as pris d’ l’ âdje, in, mi fi…" Adon, on a fini pa s’ rimète à l’ ovâdje èt taper nos siminces sins wêtî à sawè si èles tchêyenut dins dèl boune têre odobén dès sètchès pîres…

Li vl’a k’ a passé pa li pti trau. L’ Pinepoltchè n’ va rén payî po ck’ il a dsus sès cwanes. Lès djûjes di s’ payi ont trové k’ il èstéve bén tro djondu po co passé au tribunâl. A s’ n’ âdje

on l’ va lèyî viker à s’ n’ auje sins minme lî fé pwârter ène camuzole. I nd’a ène bèle pougnîye ki n’ vont minme nén s’ ritoûner dins leu vacha : i n’ è n’ ont pont ! Après tot, lès parints zèls ont co leûs ouy èt braîre.
*
On crossèfîye l’ Mèssier… L’ grand mèsse èst dite, l’ G2M-dins-mi-stauve s’ voléve Grand Maîsse Mwinrneû èt ramoncèler tot èt rén dsos sès aîles. Mougnî tot k’ il aléve fé. Bén, oyi-da ! C’ n’ èst nén l’ tot d’ cauzer di statèdjîye, c’ è-st è nn’ awè iène ki tègne d’ astampé k’ i faut. Bén shûr, si l’ CA s’ continte di dîre amen èt s’ lèyî pauwènemint mwinrner d’ truviè. Asteure, i va falu vinde pa bokèts l’ Grande Vikandî soce. L’ èst vraîy ki c’ n’ èst nén l’ prumêre ni l’ dêrinne; minme ki ça m’ fait risondjî à iène mwinrnêye pa on Antipåpe k’ètou aléve tot sikèter. Bof !
*

Pinsêyes
"Divizer c’ n’ est rin, savoz. C’ est multiplyi et mete exhone ki vos faut sawè fé ! "
"Vos pinsîz awè on "produt fini" ? I l’ trovenut si bin "fini" k’ zèls volenut l’ mète au batch !"
(Kon-fu-soyeû, dins "Choutèz - m’ l’ moxhe zûner dins l’ galant")
*
Dins l’ timps, on vos apurdéve à nén téléfoner à maulvau auzès djins. I n’ vos faléve nén lès disrindjî à n’ importe ké momint. Asteûre, avou l’ pwartâbe, vos l’ ploz fé kand ça vos prind èt ièsse tot bièsse di vos ritrover à cauzer à ène bèrdèleuse bwèsse. Èt dîre ki deus Inglès sont tot contints d’ ièsse arivés à sititchî on tèlèfone dins on dint ! Vos è rindèz-vos conte ? Vos sèrîz è plin èmantchåde avou vosse comére èt ètinde vosse binåmêye feume vos doner l’ lisse dès comissions à ramwinrner... Ène afêre à vos oblidjî à ridobler l’ dåze di Viacrå, ènn’don.
*
I parètréve k’ on arive co à disfinde li walon ! A kî don ? Nén à mi, todi, ki scrît l’ walon come i n’l’a nén studyî èt ki l’ cåze come ça lî xhone, ki s’ prind lès pîds dins l’ powêzîye, ki tchante come on saya, ki l’ mitan d’ sès tayons èstîne flaminds, k’ inme bén lès vîs cayèts èt cki n’ rixhone à rén

A môde di rén, on comache dispû d’pus d’ 411 pâdjes ! Faléve-t-i ricomincî ?
Èt dsus
http://users.swing.be/rabulets/Index.htm, avoz vèyu ?

On rimonte à l' INTREYE ?