Dins tos lès linwâdjes, lès mos dîjenut savént ck’ on vout bén î trover èt comprinde.

Walons, èsse ki Casanova, Rabelais arîne-t-i wazu sicrîre, mètans, on roman d’ Syince Paskêye; Poline Reage, l’ Mårkîze di Sèvignè, Hèrvî Båzén, JJ. Rosiå, Simènon, evd, arîne-t-i balziné po mète leus rimimbrances dsus l’ papî ? On s’ poréve li dimander tot lîjant l’ "nén racontrèsse" Ranteule do pPrétins 2 002. P’tète bén k’ on aréve sayî dèl leû disfinde ?
Dji n’ saréve m’ èspliker pokwè, mi, dji m’ va co continuwer à fé c’ki m’ plaît èt come dj’ èl pinse. A mwins ki, c’ èst tot bièsse, i gn’a dès disfinses ki m’ faut todi passer oute.
*
Stûve Fåssète, monté è balon, a faît l’ toû dèl dagne. Sès boles ont-èles rifté l’ têre téle lès cines do Sint Nicolå dès studiants ?

Parètréve ki 41 miyions d’ Uropèyins (28 au cint) sont strindus à l’ ovrâdje. Minme ki ça costêye 20 miyårds è pièrdârdjes di timps. Èt lz ôtes 72 au cint, è purdant, zèls, tot leû timps èt co s’ tinu è dirèk, pa ècsimpe, au corant di cki s’ passe è Wimblèdon, au Mondiå-Djapon, au Toû d’ France, è Rèland Garåse, evd, i rapwatenut d’ pus à leû Soce ?
*
On Ardjéntin d’Èvèke catolike a lomé "prête" sèt feumes. Po fwârcî l’ mwin au Påpe èt ièsse à s’ n’ auje, il a fait çoula au mitan do bia Bleuwe Danûbe, inte l’ Almagne èt l’ Otriche. Lès ordinâcions ont stî condanêyes èt on vouréve minme èscomunier lès "curèsses". Pokwè don ? Après tot, dispû l’ timps k’ i gn’a dès coméres ki sont médes, èsse k’ on èst pus mau sognî ? Èt lès cines ki vont rarindjî au pus wôt nos satèlites, l’ font-èles mwins bén ? Adon, ènn’ don, n’sèrîne-t-èles nén tot ossi bounes po riwêtî au salut d’ nos âmes ki po nos "åmes swîte åmes" ?
*
Oufti ! l’ G2M avou s’ C4, riçuvréve ène bistoke di 10 miyons d’ Uros. Dîre k’ i gn’a k’ i lzeu faut fé mastokes di pus à l’ eûre o po sayî di n’ nén ièsse disbautchî èt n’ rén awè !
*

C’ èst tot d’ minme drole. A l’ place do Mèssîye d’ Vivindi, parèt-i èmantcheû, on mètréve on Djan Foûrtot. S’i n’ fait nén mia, on n’ pora nén dîre k’ on n’ èstéve nén prévenu.
*
"C’ èst bin toumé qu’ i ploût l’djoû dèl fièsse" k’ on dit à Lîdje. Comint l’ mète è Françès ? dimande Clèyante ki trove ça dialèctal èt mète "C’èst bien regrettable qu’.." Po m’ paurt, k’ a todi ètindu "Bén èchu ki…", dji diréve pus râde ki c’ è st-ène vîye tournûre dimèrêye dins nosse linwâdje. Mins, ènn’ don, kî seû-dj’ po nd’ aler conte lès mias èdukés ?
*

Dès ans au lon, il a tchanté dins l’ vîye linwe, ki rixhène todi à ène sakwè, di sès tayons èt vinde bén mwins k’ è Françès. I vént d’ moru à 87 ans, l’ 2 d’ Djulèt 2 002, dins ène maujone ewousse k’ on fini sès djoûs "à s’ ripwazer", Au Sârt. L’ boune Nût