RABULèTS 2002                    Webpanel.gif (1408 octets)        Nos vola kand minme à l’ pâdje 75
do Volume 2 dèl Trwèzyin.me anêye

 

Sovént c’ èst deûr di s’ mète foû dès idêyes tot faîtes. Insi on nos a on djoû sotnu ki Châle Rogier, l’ Lîdjwès di 1830, èstéve on françès ki (bén shûr, ènn’don) boutéve po ls intèrèts dèl Fraaance. Si dès djins dîjenut çoula, c’ èst passk’ il a vnu au monde (è 1800) à Sint Quentin. Dins c’ ca-la, kèsse k’ on pora dîre do dèmineû DeHaene ki, li ètou, a tèté po l’ prumî côp dsus lès têres dèl pus vîye fèye d’ l’ Èglîje ? C’ èst l’ vraîy k’ i gn’a dès fîyes k’ on s’ dimande èwousk’ on lès va cwêri…
(Èt Charlier djambe-di-bwès, d’ èwou èstéve don-t-i ?)
*
Tant k’ on èst dins lès mîjes au monde. Parètréve ki lès èfants dès momans-pwarteuses (i n’ vos faut nén confonde avou lès ièrtcheuses) n’ ont a sofri d’ pont d’ psikolodjike rispitâdje (sèkèles). C’ è-st-ène Univèrsité d’ London k’a studiyî ça d’ près èt dîre ki cès djonnes là on minme dès mèyeus djondâdjes (rapwârts ?) avou leû parints ki s’ i z’ avîne sitî naturèlmint z-ovrés. Tos lès contes faits, i radjoutenut tot d’ minme ki "cès èfants là sont co bén djonnias èt i nos faut ratinde po vîre cki l’ famile va divnu kand i sèront pus grands."
Èt lès cias, arivés pa l’ voye di l’ "in vitro", ki n’ polenut moustrer k’ ène burète èt dîre "vola m’ poupa" ?
Èt ls èfants di discoplés ? èt lès orfulins ?

On nos a t-avizés ki, si l’ timps è-st-au bia li 8 di djulèt, Flupke èt Matile s’von-t-èvoyî è l’ aîr pa-padvant dès djonnes. Si fait mwê ça va ièsse rimètu au 10. I gn’a rén mau avou ça, parèt k’ça va s’ passer è planeu.
*
Ulrich ni s’ a nén dopé ! I n’a fait k’ bwâre on cati avou dès soçons èt avaler deus pulules k’ on lî tindéve po ki s’ distrindiche. Manke di pot (bèlje ?) li lèdmwin on l’a controlé èt fé pichî dins on bocau…
*
On nos va arindjî dès djoûs sins rolâdje. Tchaur2.gif (3956 octets)
I nos va falu lèyî lès vwètures è l’ rèssère. Po nos î oblidjî, on va p’tète fé come ôte paû ?
*
È 1567, Ludovico GUICCIARDINI sicrîjéve :
"…(È l’ Flande) i cauzenut pa tos costés, sauf dins l’ Galicante Flande, leû flamind linwâdje , MINS pa l’ rile dès sicoles èt lès djôzâdjes avou lès ètrandjîrs, ètou passk’ i z- èvoyenut leûs èfants, co tot djonnes, aprinde li françès è l’ Galicante Flande èt èl

 

France, i conèchenut tèlmint ci citêye linwe k’ èle èst familîre po totès cougnes di djins, atindu principaulmint ki, di nature, i z-î sont fwârt intèrèssîs, c’ èst pokwè i l’ apurdichenut fwârt aujîmint…"
Po c’ki èst dès do Hènaut, i dijéve : "(Lès djins) I sont vrêmint civils èt z-umins, sauf ki l’ pus grande paurt do peûpe è-st-ea nén prinde avou dès picètes (odieus) èt d’ mwêje natûre. On î cauze françès, ène miète grossî èt tchamoussé; linwâdje k’i lomenut wallon, mins lès nôbes èt d’s’ôtès èstimêyes pèrsonnes djôzenut li bon françès èt l’ pus grande masse apudenut ètou l’ flamind passk’i n’ sont nén lon èri d’ Flande".
Po cki èst d’ Nameûr : "lès djins î cauzenut l’ françès d’leû moman. C’ n’ èst nén l’ mèyeû."
Po cki èst d’ Lîdje : "Lès djins î cauzenut l’ françès. Passk’i sont èteure li France, l’ Almagne èt lès Plats-Payis, il èst fwart drole èt poké mins i s’ purdje èt s’ ricoridje. Lès nôbes èt lès cias k’ on dèl kalité cauzenut fwart bén…" Come kwè, pa côps, i fauréve rimonter pus wôt ki 1830 po trover dès rèsponsâbes…
*
A crwêre k’ on a dès lîjeûs au Pakistin. A pwinne nosse pâdje 73 rècheuwe ki l’ bauchèle k’ on vos î causéve riçuvéve di s’ govèrnimit l’ bistoke di 8 300 dolards. Èle va s’ è sièrvu po douviè ène sicole pou lès fèyes. Lès "fwarçeus" ? On n’ è djôz nén. Ptète ki, come sovént vêci, i z-ont l’bènèfice do "sursis".

A môde di rén, on comache dispû d’pus d’ 425 pâdjes ! Faléve-t-i l’ fé ? Aloz sawè !
Èt dsus
http://schoovaerts.j.tripod.com avoz vèyu ?

On rimonte à l' INTREYE ?