Vola septante-cink ans k’ Pîre Alechinsky a vinu au monde à Brusèles. È 1949, sès sicoles finîyes à La Cambre, i mousse dins l’ socenâdje "Cobra". È 1951, il èst dèdjà foû d’ Bèljike èt bagué à Paris. Po fièster sès ans, audjourdu, i moustère sès ovraedjes dins l’ "Salon d’ Art" (on pout todi s’ î fé côper lès tchivias) ruwe Hôtel des Monnaies à Brusèles (djusk’a l’ 7 di dècimbe) mins vos poloz èto ritrover tos sès lîves à l’ botike Rossaert, Nosestraat à Antwerpen (djusk’au 4 di djanvî 2003). S’ coûr s’ pât è deûs pus râde tot purdant d’ l’ âdje, i s’ dit co bèlje dins s’ n’ âme, fwârdjî come bèlje èt s’ tièsse plinne di djurons bèljes, su l’ pont d’ rèche, machîs auzès sovenances di sès soçons k’ ont passé oute : lès Dotremont, Jorn, Antonio Saura, Topor, Bram Van Velde èt lès Chillida. Comint s’arindje-t-i ? Tot rissatchant bén do plêji dins sès ovaedjes.
(Vos passoz pa Anvers ? Alèz don riwêtî, au Musêye dèl Marine, l’ " Vue du Port  ", da Matthieu Schoevaerdts.)

Todi à Brusèles, à l’ Galerîye "UsageExterne", ruwe do Vî Martchi aus Grinnes, on pout ritrover sakants djonnes artisses dins on machâdje di "design", pintures, skulteûres o co fotografîyes : Robert Kot, Cindy Colin, Géry Delcroix, Corentin Dombrecht, Xavier Gigot, Diederick Van Hövell, Geneviève Errembault, Nicolas Le Buan Benic, Arthur Martin, Terasa Sdralevitch, Emilie Lecouturier, Patrick Van Roy.

A Gand, dins lès cayèts d’ Europalia, à l’ MAUJONE D’ALIJN, Kraanlei 65, djusk’au 5 di djanvî, " Face à Face, Rituels et traditions dans la vallée des roses " : on ridchèrbaedje di moussemints, di brotches, pindants, colîs èt d’ tapis "kilims" bulgares k’ont vinu d’ on Musêye d’ Sofia.

Ène chîje di libe ? Alèz don vîre HOP, l’ prumî lon film do Bèlje Dominique Standaert. L’ oûve k’a stî faîte avou lès caurs dès deus comunotés conte l’ istwêre d’on djonne "pygmée" arivé sins papîs amon nos ôtes. Kalomba Mbuyi î tént tièsse à Jan Decleir k’a sitî si fwârt dins "Daens" èt ki c’ côp ci djôze è françès. Vos aloz minme è nn’ awè plin lès ouys di nosse soçonne Alexandra Vandernoot, asteûre parisiyinne, ki dimère, lèye èto, fîre d’ ièsse Bèlje

Tant k’ on èst dins l’ cinèma, l’ Comunoté Françèse (di B.) ni sèréve pus à balziner po dner dès liârds à Djan Bucquoy èt l’ aspaler à ariver au coron di s’ film… (24.10.2002)