RABULèTS 2002                    Webpanel.gif (1408 octets)        Nos vola kand minme à l’ pâdje 80
do Volume 2 dèl Trwèzyin.me anêye

JAN FABRE

L’ ome faut-i co vos l’ présinter ? Artisse pinte, dessinateû, sculteû, bouteû, arindjeû d’ tèyâte obén di cramignons èt shûrmint avou bén dès ôtes cwades à s’ violon, Jan Fabre a vnu au monde è 1958 à Anvers. Pou sakants i sèréve on fèl arnaûje d’ anarchisse, pou dès ôtes i sèréve minme on fayé fachisse. Èst-i on provocateû ? L’ a-t-i stî ? l’ èst-i co ? Sès ovrâdjes si polîne vîre è l’ Avignon, o dsus lès meûrs di grands musêyes, asteûre, è vola iène, à l’ dimande dèl Rinne Paola lèye minme, au Rwèyal Palå ! C’ côp ci, ci n’ èst nén on machurâdje au bleuwe crèyon à bolète, ci n’ èst nén on arindjaedje di cayèts odobèn ène banselêye di cotes, c’ è-st-on plafonâdje avou 1.400.000 scafiotes di pititès bièsses d’ Asîye, 27 milumètes chake, aclapêyes iène à iène pa-padzo l’ plantchi dèl sale dès Grands Mirwès èt s’ lampe k’ î pind au mitan, avou l’ aspalâdje di 29 djonnes artisses et d’ one dîjinne di samwinnes d’ ovraedje. Minme ki nosse Rinne î a mètu s’ mwin sins awè sogne ki l’ glumiant ni si staure dsus sès brès…

Conèchant c’ki Jan a dédjà sititchî dins ses oûves di s’ song èt di sès… touches, on èst à s’ dimander si, tévôzé, l’ a-t-i wazu co c’ côp-ci ?

On n’ pout nén daler au Palå come on l’ vout, mins vos ploz vos ratraper tot dalant taper on ouy dsus sakants oûves da Jan (25 places, 18 films di cinèma, 15 sèrîyes di dèssins) au Citadelpark di Gand, do maurdi au dimèg,e, djusk’a l’ 2 d’ fèvri 2003.

On n’ va nén roviyî d’ vos dîre qui l’ Palå a èto priyî Dirck Braeckman (fotos) èt Marthe Wery (sèt vètès pinteûres plinnes di lumêres). Cite intrêye do contimporin art vêla a stî arindjîye pa Jan HOET (SMAK di Gand), Laurent BUSINE (MAC’S do Grand Hornu) èt Ludo BEKKERS ki s’sont mètu èshone po ça..

(27.10.02)

 

 

Fabre5.gif (16033 octets)

A môde di rén, on comache dispû d’pus d’ 429 pâdjes ! Faléve-t-i l’ fé ? Aloz sawè !
Èt dsus
http://schoovaerts.j.tripod.com avoz vèyu ?

 

On rimonte à l' INTREYE ?