AUJAU (AISEAU-PRESLES)
(OIGNIES - AISEAU -CENTRE - PRESLES - ROSELIES)
L'ABÎYE - AUJAU CENTE - AUJAU PRÊLES - ROYËE

ROSELIES : a view with the Church
Royêe, l' reuwe ki mwinne à l' Èglîje

AUJAU D' SIÈKE È SIÈKE
Dins "Lès dèlice au Pays de Liège", l' mwinne d' l' orde di Sint Françwès, SAUMERY dit è 1740 : "L' tchéstia d' Aujau, a stî bati pa Ane de LIGNE dsus l' gripète d' én tiène avou, autoû, sakants fwart longueuwes vôyes."
L' gros dobe batimint, avou dès toûs aus cwanes èt iène au plin mitan, èst dins ène grande carêye coû. I gn'a ddins ût bias apartimints avou lès ofices padzos. Lès stauves èt lès lodjmints dès mèskènes èt vârlets sont ddins on ôte batimint djusse è face. C' èst là qu' èst l' pwate d' intrêye ki faut passer on pont au dizeu do fossé. L' corti è-st-ètou bén bia, rèssèré dins éne charmîye wôte di 45 pîds (c' èst iène dès pus bèles do payi) i fait trwès bonîs. On inte pa deus grîyes d' fiêr k' on pout î vîre au truviès d' pus d' én partêre, avou dès postûres, dès piramîdes èt dès balustrâdes. Di d'là on passe dins lès vôyes (avenues). Iène mwinrne à én bwès paurti è sitwèle pas dès rotes di Charmille ki dischindenut viès Sambe.
L' tchèstia è-st-ocupé pa S'n' ècsèlince Châle-Manuwèl-Djozèf, prinde di Gavre, mârki d' Aujau, baron èt signeûr di Monchô, govèrneu, capitinne djènèral èt sovèrin bayi do Conté di Nameur. Il èst l' chèf dèl Maujon de Gavre, iène dès pus vîes èt dès pus ilustres dès Plats-Payis. I a stî fait Prinde è 1736 pa Châle VI, impèreur d' Almagne."

Come on l' vèyu, l' campagne d' asteure, k'on dit "di li Stwèle", dwèt s' lomâdje au ptit bwès k' avéve li fwâùe dène sitwèle. L' Charmîye dont on cauzève, londjéve lès djârdins d' èle ruwèle "do curé". L' curé î a dimèré avant k'on n' batiche li prèsbitêre. Ène vôye avou dès ârbes di chake costé è nd' aléve do tchèstia djusk'a l' cinse di Menonry.
È 1742 Djan-Djosèf PESTIAUX, ouyeus, a l' autorisâtion do prinde de Gavre d' fouyî ène rôye di tchèrbon à l' avalêye d' Lambûsau d'sus Mougnelêye, ki rilève d' Aujau, po l' pri di ût ècus d' Èspagne à payî tos lès ans. Come li propriétêre dèl têre èst Nicolas Detraux, i duvra lî payî po lès domâdjes k'il î fait èt rimpli lès traus dès fosses vûdîyes èt abandnêyes.
È 1750, rive à Aujau li postûre d' ardjint da Nosse Dame do Pilî. C' èst Madame li Contèsse de Lannoy ki l' aréve donêye. Èle lî vinéve d'ène bistoke dès Madjistrats di Saragosse. Faut dîre ètou, k'i gn'a ki dîjenut k' èle a stî rapwartêye pa on prince di Gavre k' avéve sti oficî dins l' armêye d' Èspagne. On djoû k' il avéve peû po s' vîye, il avéve promètu, s' il è rèchapéve, di fé l' bistoke à l' Èglîje d' Aujau di cite Avièrge là k' èstéve fwart vènèrêye è l' Ispanîye. Foû dès rûjes, il aréve tinu parole.
Vola todi ck'on pout lîre dès ordonances do mârki au sudjèt l' arivâdje dèl postûre :
"Sy le Prince namène par lui même la vierge du Pilier, il l' envoyera avec son carosse à six chevaux et un prêtre. On ira la recevoir en procession jusqu'au bout du plantis, sy elle vient de Chastelet, et jusqu'au petit pont de Menonrieu sy on vient par là. Il suffit qu'on ait deux flambeaux devant elle et les deus chandelles des filles. Les filles pourront la porter dans le baldaquin de l' autre vierge. Après qu'on l'aura exposée un peu dans l' église, on pourra d'abord la mettre dans la niche qui est préparée. Le sculpteur de Fleurus fera une image de la même façon, qu'onpourra argenter en faux, et retirer la véritable dans une place du château pour être exposée à l' église à toutes les grandes fêtes de l' année."
Ène "bule" è latén do pape Benoit XIV fonde è 1755 ène confrêrîye è l' èglîje d' Aujau è l' oneûr di Nosse-Dame do Pilî.

L' Èglîje d' Aujau, batîye dsus l' place d' Aujau asto do tchèstia, consacrêye è 1732, a vèyu s' clotchî s' taper à têre è 1955. A cauze dès Fosses, lès têres avîne trop boudjî. On l' a totafaît razêye 1970.
Di 1955 à 1992 on a fait mèsse dins l' vîye sale di cinéma BANCU.
È 1990, Madame Coene, po l' minisse, a vnu macner l' pumîre pîre dèl novèle èglîje - fwart modèrne- à l' crwèzêye dèl ruwe do Cente èt dèl ruwe do Faubourg. Li 2 d' fèvr 1992, trwès eûre di l' après-nonne, l' èvèke di Tournè, Monseigneûr Djan HUART, a vinu l' bèni èt fé mèsse avou l' dwèyin HENRI d' Tchèslèt. L' djolîye grote à l' môde di Lourdes  k' i gn' avéve dispû dès ans avéve disparètu po todi.

: A tanawète on pèche dins l' fossé do tchèstia. È 1753, on ènn' a rissatchî 397 cârpes po z-è ritaper 280 dins l' basse (ètang). Li gârde dès bwès do mârki èst Pîre GECE. È févri dèl minme anêye, l' prince Francwès a mârié Marîye-Ane di Rouveroy, tchanwèsèsse d' Andène. On a grandmint fièsté s'n' arivêye : "   "lès boêtes campes" sonenut avou l' muzike, lès danses si sont chûvu. L' djonèsse a bévu 3 aymes di bîre à leû santé."
Li 25 d' avri 1759, l' impèratice Marîye-Trêze d' Otriche, done li drwèt à André PUISSANT, maîsse di Fwâdje à Châlèrwè, d' instaler dès fwadjes, afinèrîyes èt platinèrîyes à Aujau.
1794. Dès soûdârds françès s' fêyenut sognî à l' Abîye d' Labîye (Oignies). On rèquèsitione à rlaye foûr èt aveine po lès armêyes do rwè ki pudenut ètou 50 tchivaus èt cink tchaurs avou chake leus 4 tchivaus d' atèlâdje.
Li 11 di fèvri 1811, l' famile PUISSANT d' Châlerwè, rivind s' fwadje à André-Djozèf FRISON po 15.000 francs.
È 1813, on conte 62 tchivaus à Aujau.
Po 1814, on pout lîre dins "Histoire de Farciennes" da Kaisin : "L' anêye a stî mwêje. Lès Françès è nd' alés, lès armêyes ki lès ont rimplacés s' sont abatus come dès sautrèles. Lès Prussyins èt volîne todi d' pus, come tos lès almands dèl confèdèration èt lès tropes ramoncèlêyes pa lès Inglès. I gn'avéve dès Russes, grands come dès djèyants, djintis èt plins d' xhoûte, èt avou zèls dès djins do Nôrd."
1817, lès rèlikes da Sinte Marîye d' Oignies, muchîyes à Farjole dins ène cinse au "Trau dès Prés", son-st èbârkêyes à Nivèle.
Li 19 di févri 1821, après rèclamâdjes dès djins d' Aujau, on paurtâdje dès rèlikes èst fait. Li buste di doré kûve, avou li dzeu do cwârp dèl Sinte, èst rapwârté. C' èst li k' èst solènèlmint pwarté à l' pôrcèssion d' Sinte d' Marîye d' Oignies l' dimègne ki shût l' Ascension.
Dins cès anêyes l, on s' mèt à rissatchî do tchèrbon ène miète pa tos costés dinsl' comune. Dins l' bwès d'l' Estache" i gn' avéve d' pus d' ène fosse, i gn' avve li cine do "djardinî" dins l' bwès dèl Vime taye èt dsus on bikèt d' Tchampfrumint avant k'on fêye on vraîy tchèrbonâdje.
Après 1828, li rissatchâdje di l' ouye foû do tchèrbonâdje a profité à Aujau. Lès ovrîs n' èstîne ki wêre payîs. A l' djoûrnêye s' èstéve :
po l' facteûr : 86  cintimes;
po l' porion : 68 cintimes;
l' mineû : 64  cintimes;
l' bourikeû : d' 39 à 56 cintimes;
l' trinneû : 47 cintimes;
l' baloteû : 30 cintimes;
l' vèyeu : 30 cintimes.
Li 27 di djanvî 1826, lès Fwadjes d' Aujau polenut bati deus fors à tchau à "puddler" tchaufés au "tchèrbon d' têre". Pa én arèté do Rwè do 13 di févri 1828, le Prince de Gavre, comte d' Oultremont èt Alexandre Gendebien, plaideu d' Brusèle, ricuvenut l' concèssion èt l' permi po èsplwèter l' tchèrbonâdje d' Aujau-Prèles, Fosse do Bwès d' Broû, dit d' Royêe o co Panama.
Li minme anêye on done ètou dès autorisation à l' Soce di Pondloû.

 
Li lèdmwin dèl rèvolucion d' 1830, l' Ingénieu dès Mines do district, comissêre do Govèrnumint, signe li placârd shûvant mètu à l' bèrtèke dèl Fosse do Bwè d' Broû :
"Châlèrwè, li 20 d' octôbe 1830.
Mès djins,
Dins cki nos vikansdi cès timps ci, cki dwèt l' pus ritnu lès béns pinsants citwèyins èt vèritâblumints amijtauves dèl patrîe, c' èst ki faut sins ratinde èployî tos leus moyins s'i z-ont l' brès, dès caurs odobén ôtès cayèts po èspêtchî k' dès dinrêyes d' trobles o d' arnaujèrîes ki sont lès pus grands énmi dèl nacionèt di s' prospèrité.
Dji m'véns don vos priyî, mès djins, au nom dèl Patrîye, au nom dèl publike riconxhance k'vos aloz ièsse à minme di mèriter èt, bén shûr di vos propès intèrèts, à mète totès vos fwaces èt mète è n' ovrâdje tos lès bons moyins èt tot cki faut po doner à bouter aus ovrîs dèl fosse èt lès ritnu sins djoke dins travias.
I vos faut bn fé comprinde à nos braves ouyeus k' on todi mostré dès bons sintumints po l' Patrîye èt fidêlmint rimpli leus divwêrs, ki totès lès disturbances ni polenut k' alachî l' l' nacional Govèrnemint dins lès mèzures ki fauréve prinde po l' bén do peûpe; k' apauvri nosse payi o  fé toûner à rén nos èsplwètacions èt, po fini, nos amwirner tèrtos à l' minme mizére èt divnu po shûre li ptit mouchon dins l' pougne dès oprèsseus ètrindjîrs k'on poréve pus nd' aler conte pa manke dès dinrêyes k' on aréve tapé foû à maulvau.
Ami do peûpe èt, mia, dès ovrîs dèl fosse, ki dj'a viké au mitan dès anêyes au lon, dji cauze franchmint èt è conzyince. I n' faut nén k' dins l' ause do mia d' on ptit momint, i doniche li mwin aus cias ki volenut, ptète sins mèchanceté mins sins voye pus lon, distrûre è kèkes djoûs, nos prospèrité èt lès béns ki, po sakants anêyes, duvenut nouri leus èfants èt leus familes. I n'nos faut nén mète à l' abat l' nom d' Bèlje adlé lès ètrandjêrès nacions ki nos riwêtenut.
Dji vos prîye di fé mète, sins ratinde, à l' bèrtèke di totes lès fosses dès copîyes dès présintes èt ki mès paroles fuchenut conxhu. Ricèvèz, Mès Djins, l' assurance di m' ètîre considèration.
signî : Brixhe
Indjénieur do Cwârp dès Mines"

È 1834, on fouye po l' Fosse Sint Djâke à Tergnêe. È 1840, l' Soce d' Oignies-Aujau, creuse l' Fosse di Champfrumint; on comince à rissatchî à l' Rèspe è 1892.
Après lès tchèrbonâdje, l' Manufacture dès Glaces di Sinte Marîye d' Oignies èt lès Produits Chimikes d' Aujau comincenut à prodwîre. Dèdja ècolodjisse, lès Produits Chimikes batichenut ène tchiminêye di 100 mètes di wôt po rtaper au lon lès mwêjès fumêres èt leu gaz. On l' fait fumer po l' prumî côpdvant li Rwè Lèyopold I ki passera l' nût dins l' tchèstia d' l' Abîye di Sinte Marîye d' Oignies.
Viès 1900, l' Soce dès Euwes do Bassin d' Chalèrwè comince à pomper c'ki soûrd au Faubourg.

È 1912, l' Fwadje d' Aujau s' djoke. Pus pont di tchibaus dins lès reuwe do Cente o dèl Gare. L' locomotive "Marîye" ni va pus vnu satchî lès wagons kèrdjîs dins iène dès pus vîyès sation do payi. È 1934 on comince à sèrer lès Produits Chimikes...

Dimèrîne à Aujau :
È 1815 : 443 djins
È 1826 : 483
È 1836 : 608
È 1847 : 890
È 1857 : 1336
È 1875 : 2046
È 1885 :  2385
È 1895 : 2765
È 1905 : 3335
È 1914 : 3475
È 1930 : 3709
È 1940 : 3704
È 1950 : 4020
È 1960 : 3869

Viè 1930, dins l' reuwe Hypolite Binon, adlé l' meûr do tchèstia (l'Abîye), André Vèdts, s' moman, s' matante èt s' marène.

*
(Nos vola co arivé au coron d' notâdjes  ramoncèlés pa André Vedts. Si avoz d' l' agrès po l' sudjèt, i vos v falu asteure cachî après lès trwès kat lîves k' èksistêyenut èt nd' aler ètou fé on toû dins lès artchîves di Nameur, di Lîdje o co d' Brussèle. Boune ranche !)

Avoz lèyu ck' i gn'a à AUJAU èt LABÎYE ? On wête à nd' aler vîre ôte PAU ?